Menntun
Iðnfræði er hagnýtt 90 ECTS eininga nám til diplómagráðu á háskólastigi. Námið er skipulagt þannig að hægt sé að stunda það samhliða vinnu og ljúka því á þremur árum.
Til að útskrifast sem iðnfræðingur, sem er lögverndað starfsheiti, þarf nemandi að hafa lokið sveinsprófi í iðngrein á viðkomandi sviði og veitir námið þá rétt til meistarabréfs.
Iðn- og tæknifræðideild er aðili að samstarfsneti um að þróa og bæta kennslu í verkfræði og tæknifræði. Í dag eru um 100 háskólar frá öllum heimshornum þátttakendur og vinna þeir kerfisbundið að því að bæta skipulag námsbrauta og þróa námsbrautir í tæknigreinum með áherslu á þarfir atvinnulífsins.
Nám í iðnfræði
Nám í iðnfræði er skipulagt sem þriggja ára nám samhliða vinnu en einnig er mögulegt að ljúka náminu á skemmri tíma. Iðnfræði er kennd í fjarnámi en tvær staðarlotur eru á hverri önn, eina helgi í senn.
Víða á landsbyggðinni geta nemendur fengið aðstöðu til hópvinnu í símenntunarstöðvum, fræðslusetrum og háskólasetrum, en á höfuðborgarsvæðinu býðst nemendum vinnuaðstaða í Háskólanum í Reykjavík.
Nemendur í iðnfræði fá fjölbreytta og hagnýta þekkingu á sínu sviði, styrkja stöðu sína á vinnumarkaði og verða hæfari til að takast á við fleiri og fjölbreyttari störf. Með því að ljúka náminu getur nemandi öðlast meistararéttindi og lögverndað starfsheiti sem iðnfræðingur.
Hægt er að lesa nánar um nám í iðnfræði á vefsíðu Háskólans í Reykjavík.
Rafiðnfræði
Starfssvið rafiðnfræðinga er fjölbreytt en þeir fást til að mynda við hönnun, uppsetningu og eftirlit með stýri-, lýsingar- og raflagnakerfum.
Véliðnfræði
Vélfræðingar starfa m.a. við, teikni- og verkfræðistofustörf, verktakastarfsemi, rekstur, eftirlit með framkvæmdum og uppsetningu vélbúnaðar.
Byggingariðnfræði
Byggingaiðnfræðingar vinna við fjölbreytt störf. Til dæmis verktakastarfsemi, stjórnun og rekstur byggingarframkvæmda og eftirlit með framkvæmdum.